कालिञ्चोक दर्शनले डाक्यो एजीएम, शतप्रतिशत हकप्रद जारी पनि एजेण्डा

नेपाली शेयर न्यूज/ कालिञ्चोक दर्शन लिमिटेडले आगामी पुस १५ गते ११ औँ वार्षिक साधारण सभा बोलाएको छ। मंसिर १८ गते बसेको सञ्चालक समितिको बैठकले काठमाडौँको गौशालास्थित बद्रीनाथ होटलमा बिहान ११:३० बजेदेखि सभा संचालन गर्ने निर्णय गरेको हो।

सभामा गत आर्थिक वर्षका लागि प्रस्ताव गरिएको ५ प्रतिशत बोनस सेयर र कर प्रयोजनका लागि ०.२६३२ प्रतिशत नगद लाभांश सहित कुल ५.२६३२ प्रतिशत लाभांश वितरणको प्रस्ताव पारित गरिनेछ।

पूँजीवृद्धि तथा बोनस सेयर वितरणपछि कम्पनीले शतप्रतिशत हकप्रद सेयर जारी गर्ने, कम्पनीको प्रबन्धपत्र तथा नियमावली संशोधन गर्ने, र सञ्चालक समितिले गरेका विभिन्न निर्णयहरूलाई अनुमोदन गर्ने एजेन्डा पनि सभामा प्रस्तुत गरिनेछ।

त्यस्तै, अध्यक्षद्वारा प्रस्तुत आर्थिक वर्ष २०८१/८२ को वार्षिक प्रतिवेदनमाथि छलफल गरी पारित गर्ने, लेखापरीक्षकको प्रतिवेदनसहित वित्तीय विवरणहरू पारित गर्ने, चालु आर्थिक वर्ष २०८२/८३ का लागि लेखापरीक्षक नियुक्ति र पारिश्रमिक निर्धारण गर्ने प्रस्ताव पनि पारित गरिनेछ।

साधारण सभा तथा लाभांश वितरण प्रयोजनका लागि कम्पनीले पुस १ गते बुक क्लोज गर्ने निर्णय गरेको छ। त्यसैले मंसिर २९ गतेसम्म नेप्सेमा कारोबार भई कायम हुने सेयरधनीहरू मात्र लाभांश पाउन र सभामा सहभागी हुन योग्य हुनेछन्।